“Kemi bërë një nga ndeshjet më të mira të këtij sezoni”. Ka qenë kjo deklarata e trajnerit Pep Guardiola pas fitores 1-0 që Manchester City arriti sot në fushën e Bournemouth, sukses që i dha 3 pikët skuadrës kampione të Premier League. Sukses që rikthen “qytetarët” në krye të renditjes, në pritje që Liverpool të bëjë nesër ndaj Everton, në derbi, ndonjë hap fals.
“Ata ishin të organizuar shumë mirë dhe nuk ishte e lehtë të shënoje. Ndërkohë që ne mbrojtëm në mënyrë të shkëlqyer, çka e konfirmon fakti se rivalët nuk gjuajtën asnjëherë në portën tonë. Vërtet krijuam pak raste për gol, por njerëzit duhet të kuptojnë se ishte shumë e vështirë të afroheshe në portën kundërshtare”, tha Guardiola.
“Bournemouth mbrohej me 11 lojtarë, ndaj duhej qetësi deri në fund. Falënderoj skuadrën që besoi deri në fund dhe kjo fitore është shumë e rëndësishme. Pavarësisht se çfarë do të ndodhë këtë sezon, kjo skuadër meriton përgëzime pafund. Shumë lojtarë nuk ishin në formën optimale e megjithatë ata luajtën deri në fund dhe morëm 3 pikë të arta”, u shpreh Guardiola.
