Ylli i Barcelonës, Lionel Messi, nuk është vetëm një mjeshtër futbolli, që shënjestron dhe tund rrjetat e portierëve kundërshtarë në fushat e blerta. Sulmuesi argjentinas është njëlloj “Vilhelm Teli” në llojin e tij. Kujtojmë se Vilhelm Teli u sfidua të godiste mollën në kokën e të birit, në dramën me pesë akte të Fridrih Shiler.
Pesë herë fituesi i “Topit të Artë” ka demonstruar aftësitë e tij edhe në ping-pong. “10” katalanase synonte të godiste një top ping-pongu të vendosur në majë të një shisheje plastike. Pasi dështoi në goditjen e parë, 31-vjeçari arriti ta rrëzonte topin e vogël në tentativën e dytë.
