Mohamed Salah shihet si lojtari kyç për të tijtë në betejën e kthimit të raundit të dytë të Ligës së Kampionëve, kundër Bayern Munich, të mërkurën. Një kompeticion, që është dëshira më e madhe e egjiptianit, edhe pse nuk harron “fiksimin” e Liverpool-it për titullin kampion në Angli.
“Do të jem i sinqertë, konkurrenca më prestigjoze për mua është Liga e Kampionëve. Megjithatë, ëndrra për të gjithë qytetin dhe klubin është fitimi i titullit në Premier League. Pra, jam i lumtur të sakrifikoj ëndrrën time për ëndrrën e tifozëve. Nëse e fitojmë, do të jetë diçka e madhe. Kjo është ajo, që jemi duke u përpjekur për të bërë”, – u shpreh Salah në një periudhë delikate, sepse nuk po shënon më gola, ndërsa Liverpool e humbi vendin e pare në klasifikim, duke e ”hapur krahun” për Manchester City.
Gjithsesi, egjiptiani nuk e humbet optimizmin: “Duhet t’i fitojmë të gjitha ndeshjet tona dhe të shpresojmë që Manchester City do të gabojë diku, kështu që mund ta fitojmë titullin. Mendja ime është e kthjellët, nuk kam presion. Mentalisht jam i fortë. Ne duhet të shikojmë përpara dhe të shohim se çfarë do të ndodhë deri në fund të sezonit“.
