Kritik ndaj komenteve të Christian Panuccit ka qënë edhe kapiteni i kombëtares shqiptare, Elseid Hysaj, i cili në konferencën për shtyp përpara duelit të së hënës kundër Andorrës gjeti kohë për t’iu përgjigjur edhe ish-trajnerit. Në fjalën e tij, mbrojtësi i Napolit është shprehur se ka besim te ky grup dhe se kualifikimi do të arrihet nëse të gjithë besojnë te ai objektiv.
“Besoj që nuk duhet te mendojmë fort për punën e trajnerit. Kemi ndeshje të rëndësishme dhe jemi të gjithë te kjo ndeshje, që duhet të fitojmë se s’bën, për moralin tonë e të Shqipërisë. Na duhen tri pikët për Europianin, duhet të mendojmë për ndeshjen e jo për trajnerin e çfarë ka ndodhur ditën e djeshme.
“Me njohjen që kam me djemtë e di si do e përjetojmë, jemi të gjithë me vëmendjen që duhet të fitojmë medoemos. E dimë që është vështirë. Edhe Islanda e kishte të vështirë të shënonte këtu, por të mos mendojmë për çfarë ndodhi, se ndryshe nuk do fitojmë. Jemi të përqendruar për të fituar ndeshjen këtu.
“Situata në dhoma, besoj se është shumë e mirë. Kjo humbje uk do të na dënojë për të gjitha ndeshjet e radhës që kemi dhe meqë nesër kemi ndeshje të rëndësishme është e mira të harrojmë çfarë ka ndodhur. Djemtë janë në formë të mirë. Moralisht e kemi marrë veten nga humbja me Turqinë dhe jemi gati të shkojmë në fushë për sfidën me Andorrën.
Mosbesim nga ana e Panuccit? “Nuk e di nga i buronte mosbesimi por çdo trajner ka mendimet e veta për lojtarët që ka dhe bën punën e vet. Unë për veten time besoj te kjo kombëtare dhe lojtarët. I shoh vetë të gjithë dhe këdo të pyesësh a do kualifikohet do të përgjigjet që do kualifikohemi. Unë besoj se do bëjmë gjë spektakolare. Unë mendoj se edhe me këta lojtarë që kemi do të bëjmë diçka spektakolare”, tha Hysaj.