Legjenda e Juventus-it, Alessandro Del Piero, ka folur për rrugën në Champions League të ish-skuadrës së tij dhe për Cristiano Ronaldo-n në një intervistë të dhënë për “Marca”- n.
“Finalet e humbura në vitet e fundit? Çdo finale ishte ndryshe nga tjetra. Në disa nuk kanë qenë favoritë, në të tjera kanë patur një ditë të keqe”, ka thënë ish-numri dhjetë i bardhezinjve.
“Është shumë e vështirë të thuhet se çfarë ndodh. Të arrish një finale është një rezultat i madh në vetvete. Hapi i fundit është shumë i rëndësishëm, por mendoj se bardhezinjtë do ta fitojnë përsëri Champions-in”.
“Kanë shkuar në finale dy herë në katër sezonet e fundit dhe kanë fituar shtatë kampionate radhazi. Ky ekip po shkruan historinë”, ka shtuar Del Piero.
Për Cristiano Ronaldo-n: “Ai është një kampion që e ka fituar Champions-in. Është i përqendruar te ky objektiv, Juventus e ka marrë për këtë arsye dhe plani po funksionon deri tani”.
“I befasuar nga blerja e tij? Po, pak. Cristiano mund të zgjidhte skuadrën që donte dhe transferimi tek Juventus ka qenë një operacion shumë i mirë për bardhezinjtë”.
