Drejtuesit e Paris Saint Germanin kanë lajmëruar mesfushorin francez Adrien Rabiot që të mërkurën të paraqitet për një takim “kokë më kokë” në mjediset e klubit. Sipas “RMC Sport”, brenda 24 orësh do të merret vendimi për të ardhmen e mesfushorit 24-vjeçar, i cili prej më shumë se një muaji është lënë jashtë skuadrës.
Rabiot nuk ka ndërmend të rinovojë kontratën me PSG, e cila skadon në fund të sezonit dhe nga 1 korriku ai mund të largohet kudo me parametrin zero. Ky veprim i Rabiot nuk i ka pëlqyer klubit, që edhe pse i propozoi rinovimin e kontratës mbeti duarbosh. Për këtë arsye, lojtari nuk grumbullohet më dhe do të largohet në merkaton e verës.
Gjithsesi, sipas mediave franceze me shumë gjasa lojtari do të lihet i lirë që këtë javë, pasi klubi synon t’i prishë që tani kontratën. Një “pushim nga puna” për lojtarin, që nuk do të përfitojë rrogën e muajve të fundit.
