Trajneri i Kukësit, Ernest Gjoka, debutoi me fitore sot, ku mundi Laçin në transfertë, ndërsa pas ndeshjes deklaroi:
Rikthim me fitore dhe supergol…
Është kënaqësi kur fiton. Duhej kjo fitore për skuadrën, edhe për anën morale. Ka kohë që kanë pasur probleme dhe luhatje. Jam i kënaqur që ardhja ime solli fat. Është një skuadër tjetër, komplet ndryshe ky Kukës, ka cilësi, por duhet të rrisim besimin për të arritur te suksesi.
Objektivat…
Objektivin e dini mirë. Është për të vazhduar nga ana matematikore deri në fund të garës, për ta kërkuar kampionatin.
Cili ka qenë çelësi i suksesit për të rritur moralin e lojtarëve…
Thjesht për këto ditë që pata në dispozicion, fola shumë. Gjeta lojtarë me eksperiencë brenda, dhe është mundësi e madhe për mua, sepse adaptohem shpejt.
Tifoz me Skënderbeun ndaj Partizanit?
Unë jam tifoz i Kukësit, se çfarë do bëjë Partizani me Skënderbeun, është punë tjetër. Normale që do ishte mirë për ne që Skënderbeu të bënte një fitore. Do ishte diçka e mirë edhe për kampionatin që të hapej pak gara, dhe të bëhet kampionat i bukur.
Vetëm 3 lojtarë që nga koha juaj te Kukësi. Mendoni se është më e fortë se ajo skuadër, apo?
Janë dy kohë të ndryshme. Atëherë, ajo skuadër ishte shumë e fortë dhe solide, 35 javë pa humbje. Më vjen keq që e mbyllëm vetëm me një edicion. Kjo skuadër ka lojtarë ndryshe në cilësi, dhe kanë nevojë vetëm për vetëbesim.
