E ardhmja e Romelu Lukaku mund të jetë në Itali. Sulmuesi i Manchester United, protagonist i episodit të fundit të “Signori del Calcio” në “Sky”, nuk e fshehu faktin se i pëlqen të luajë në Serie A. Sulmuesi i datëlindjes 1993 e kishte nënvizuar këtë dëshirë edhe disa vite më parë, por më pas preferoi Manchester United. “Kur u largova nga Chelsea, kam pasur mundësinë që të shkoja te Juventusi, por nuk e di pse nuk ndodhi. Nuk e ndjeva atë transferim, diçka nuk më bindi. Më pas, Conte u largua nga Juventusi“, – kujton belgu.
Tani, megjithatë, Lukaku ndihet i gatshëm të provojë aventurën në Serie A: “Të luaj në Itali është një ëndërr për mua. Shpresoj të luaj aty herët a vonë. Tani për tani jam i fokusuar te Manchester United dhe te vendi i katërt”. Më tej, sulmuesi kujton kontaktin e tij të parë me futbollin e madh, gjithashtu i lidhur ngushtë me Italinë: “Ishte finalja e Kupës UEFA ndërmjet Interit dhe Lazos. Kur pashë Ronaldon ta kalonte portierin në atë mënyrë, kuptova se duhej të stërvitesha shumë për t’u bërë futbollist profesionist”.
Së fundi, Lukaku shpjegon marrëdhënien jo të mirë me Mourinho, gjë që e bëri të largohej nga Chelsea: “Unë dëshiroja të luaja, por Mourinho nuk ma lejonte këtë, ndaj u largova. Sidoqoftë, nuk u grinda me të. Nëse një gjë nuk është e drejtë, mendoj se është më mirë të largohem. Pastaj, kur u ritakuam te Manchester United, ai më dha aq shumë, sa do t’i jem përjetësisht mirënjohës“.