Matthijs De Ligt është një nga mbrojtësit më të mirë në qarkullim, dhe është shumë afër transferimit tek Juventusi.
Mbrojtësi po stërvitet me Ajaksin, duke pritur që të arrihet marrëveshja midis dy palëve. Ndryshe nga nga sjelljet që bëjnë të tjerët, si ajo e Nejmar i cili nuk u shfaq në stërvitje me PSG, për tu transferuar tek Barcelona, De Ligt po kalon kohën e fundit me shokët e tij tek Ajaksi, duke pritur që Juventusi, të gjejë marrëveshjen përfundimtare me klubin holandez.
Ndërkohë në Holandë, kanë filluar të shesin fanellën e Juventusit me emrin e 19-vjeçarit.
Tifozët e Juventusit, gjithashtu e kanë mbushur plot llogarinë e De Ligt në “Instagram”, me mesazhet, “Ne po të presim ty në Torino, për të blinduar mbrojtjen dhe për të triumfuar në Ligën e Kampionëve.” Në sezonin e fundit ishte pikërisht ylli holandez që eliminoi bardhezinjtë nga Liga e Kampionëve.
