Gjithçka nisi në mesin e dhjetorit 2018, konkretisht në datën 16, kur Matajs De Ligt u shpall dhe fitoi trofeun “Golden Boy”, si talenti më i mirë në qarkullim, i cili organizohet nga e përditshmja torineze “TuttoSport”. Në sallë, në mënyrë të çuditshme nuk mungonin presidenti dhe zëvendësi i tij, Andrea Anjeli e Pavel Nedved, si dhe drejtori sportiv, Fabio Paratiçi.
Dy të fundit nuk ngurruan që ta urojnë fituesin, ndërsa “padroni” bardhezi u mor me babain e Matajsit, Frenk De Ligtin, të cilin e ftoi për vizitë në qendrën stërvitore bardhezi, në “Allianz Stadium” dhe madje edhe në vilën e tij. Ndërsa kronologjia e bisedimeve vijon si më poshtë:
10 prill – Luhet vajtja në Amsterdam, Ajaks-Juve përfundon 1-1, me gol të Ronaldos.
16 prill – Ndeshja e kthimit, e njëjta portë si në atë të Ronaldos. Vendos De Ligt që eliminon Juventusin dhe ashtu si CR7, tifozët e duartrokasin.
22 maj – Panorama ndryshon, pasi në një intervistë për revistën “Voetbal”, De Ligt thërret për herë të parë në apel Ronaldon: “Nga Kristiano mora një mësim taktik të rëndësishëm në ato 180 minuta”.
26 maj – Në Holandë nisin zërat, Ronaldo e ka telefonuar për ta falënderuar për fjalët që De Ligt kishte shprehur në intervistë: “Ku e shoh veten sezonin tjetër? S’e di, sepse Premier Liga është një kampionat i madh, Liga gjithashtu. Por nuk është një zgjedhje vetëm mes këtyre dy kampionateve. Madje, mund të vendos që të qëndroj edhe tek Ajaksi”.
26 maj – Sërish në këtë ditë, del një intervistë tjetër ku De Ligt nënvizon: “Ronaldo ka qenë idhulli im, sidomos kur luante për Junajtid. I vogël doja të isha si ai. Madje, edhe bluzën e parë sportive kam pasur atë të Junajtid me emrin e Ronaldos”.
9 qershor – Takimi që bëri kthesën. De Ligt takon idhullin Ronaldo, me rastin e finales së Ligës së Kombeve, por këtë herë fitoi CR7 dhe i parakaloi përpara syve me trofeun. Gjithsesi, juventini i afrohet pas ndeshjes dhe e fton zyrtarisht: “Do të vish te Juventusi apo jo?” Këtë bisedë e konfirmoi edhe vetë holandezi.
22 qershor – Menaxheri Raiola hap zyrtarisht bisedat me Juven dhe kërkon vënien e klauzolës. Juventusi aprovon dhe këtu nis e gjitha në dishezë, duke i ofruar edhe një pagë stratosferike lojtarit që bindet për të luajtur në Torino.
25 qershor – De Ligt nis pushimet në Bahamas së bashku me De Jongun, blerjen e re të Barcelonës. Aty i bashkohet edhe Pike, por mbrojtësi ua mbyll përfundimisht portën katalanasve, pasi i sqaron kapitenit të spanjollëve se ka zgjedhur Juventusin.
3 korrik – Juventusi merr garancitë e De Ligt, pasi në Torino e presin 12 milionë euro rrogë për 5 vite. Dhe italianët bëjnë ofertën e parë: 55 milionë, plus 10 bonuse. Ajaksi përgjigjet: 75 milionë!
6 korrik – Këtu marrin fund të gjitha amnezitë: De Ligt telefonon vetë Sarrin për të kuptuar më shumë se çfarë aspektesh taktike e presin në Torino dhe Juventusi bën sakrificën e radhës.
8 korrik – Menaxheri Raiola del hapur: “De Ligt ka mbyllur çdo akord me Juven, por tani presim që ta zgjidhë me Ajaksin.
15 korrik – Mbyllet gjithçka: “De Telegraaf” specifikon se Juvja ka plotësuar kërkesën ekonomike: 70 milionë plus 5 bonuse. Lojtari do të zbarkojë në Torino të martën në mbrëmje dhe dje kreu vizitat mjekësore siç ishte nënvizuar.
