Në momentin që, Antonio Conte erdhi në krye të pankinës së Interit, mes klubit “zikaltër” dhe Mauro Icardi u hap një konflikt.
Kjo pasi Conte i ka thënë drejtuesve se nuk dëshiron në skuadër lojtarë që rrezikojnë të përçajnë klubin.
Sipas “Gazzetta dello Sport”, drejtuesit e Interit – Beppe Marotta, Piero Ausilio dhe Lele Oriali u takuan të enjten me Icardin dhe i thanë se ai mund të mos luajë asnjë minutë gjatë sezonit të ardhshëm.
Kjo gjë nuk i pëlqeu aspak argjentinasit, i cili dëshiron të largohet nga Interi vetëm nëse i sigurohet transferimi tek Juventus.
Nëse ky transferim nuk ndodh dhe Icardi mbetet jashtë skuadrës së Interit për Serie A apo Ligë të Kampionëve, argjentinasi ka thënë se do ta padisë klubin.
Ai do të akuzojë klubin me pretendimin se klubi po tenton ta detyrojë atë të largohet nga vendi i punës së tij përmes keqtrajtimeve, izolimit dhe frikësimit.
Nëse Icardi detyrohet të stërvitet i ndarë prej pjesës tjetër të grupit, ai mund ta fitojë këtë proces gjyqësor. Këtë gjë e kishte bërë Goran Pandev kur e kishte paditur Lazion që ia kishte përfunduar kontratën para kohe.
Një gjë e tillë do ta lejonte Icardin të largohej nga klubi si transferim i lirë menjëherë, përkundër që kontrata e tij në San Siro është e vlefshme deri në qershor të vitit 2021.
