Paolo Dybala kërkon me çdo kusht të qëndrojë tek Juventus. Pas refuzimit që i bëri skuadrës së Manchester United, tani sulmuesi ka refuzuar dhe klubin e Tottenham.
Londinezët kishin ofruar 70 milionë euro për shërbimet e argjentinasit, dhe ‘bardhezinjt’ kishin rënë dakord me londinezët. Por, në negociatat mes lojtarit dhe klubit anglez nuk është gjetur gjuha e përbashkët dhe kjo për shkak të kërkesave të ekzagjeruara të Dybalas.
Sulmuesi ka kërkuar një rrogë prej 10 milionë euro, ndërsa në rast se marrëveshja arrihej, përfshihej edhe një komision i majmë për agjentin e tij.
Ndërkohë, një tjetër pengesë mes palëve është edhe e drejta e imazhit. Futbollisti i ka dhënë të drejtën për t’i përdorur një kompanie, teksa në klubin e Totenhamit nuk e kanë këtë filozofi dhe anglezët kërkojnë t’i menaxhojnë vetë të drejtat e imazhit të futbollistëve. Kështu, për Dybalan ka rënë pista për t’u transferuar në Angli, pasi merkato në ishull mbyllet për më pak se 8 orë.
