Na pëlqen apo jo, revolucioni teknologjik në futboll ka nisur. Dhe, me shumë mundësi, nuk do të përfundojë së shpejti. Polemikat që vazhdojnë të jenë prezente pavarësisht prezantimit të VAR-it, nuk duket se do ta ndalin FIFA-n që vijon betejën e saj për të përmirësuar (ose të paktën tenton ta bëjë) vendimet e arbitrave.
E vetmja risi që nuk ka prodhuar polemika është Teknologjia mbi Vijën Fatale. Në atë rast, nuk nevojitet ndërhyrja njerëzore, ashtu si “Syri i Fajkoit” në tenis dhe arbitrit i vjen sinjali në krah: nëse është gol në rregull, nëse jo, atëherë vendimi duhet të pranohet.
Lamtumirë anësorë – Sipas “Mirror”, arbitrat kryesorë mund të mbesin së shpejti të vetëm në fushë, sepse FIFA po mendon që t’i zëvendësojë ndihmësit e tyre me robotë. “FIFA ka ndërtuar një departament teknologjik që po e studion këtë argument. Anësorët do të zëvendësohen nga telekamerat dhe kompjuterë? Një ditë mund të ndodhë”, thotë një burim i qeverisë botërore të futbollit për tabloidin.
Por, pavarësisht se duket një skenar i së ardhmes, mundësia është që kjo të ndodhë vërtet. Sigurisht, mbetet një punë e vështirë, pasi përfshin edhe sensorizimin e gjithçkaje, përfshirë lojtarët, në mënyrë që anësorët robotë t’i dërgojnë arbitrit kryesor rezultatin e analizës së tyre.
Një tjetër vështirësi do të jetë se si sistemi i automatizuar do të menaxhojë rastet e interpretueshme, si për shembull pozicioni jondikues apo prekja e pavullnetshme dhe kjo mund të krijojë polemika.
