Kukësi i shkakton humbjen e parë Tiranës në javën e 5-të të Superligës Shqiptare.
Në takimin që u luajt në “Elbasan Arena”, verilindorët fituan me rezultatin 2-1 përballë bardhebluve.
Në minutën e 17’ ishte Abazaj që përfitoi pas një sparkate të Osmanit, dhe doli i vetëm me Bakajn duke tundur rrjetën.
Ekipi i Memës provoi të reagonte, por Kobina u ndal nga Xhika. Pjesa e parë u mbyll me avantazhin minimal 1-0, ndërsa vetëm 3 minuta pasi nisi e dyta, ishte Shkurtaj që me kokë, shënoi pas një asistimi mjaft të bukur nga Gavazaj.
Goli i vetëm për Tiranën erdhi në minutën e 83’ me anë të Kobinas i cili me rrjetën e boshatisur nuk e kishte të vështirë ta çonte topin në portë.
Deri në fund ekipi i Memës kërkoi me ngulm golin e barazimit, por mbrojtja verilindore rezistoi.