Trajneri Argjentinas Mauricio Pochettino ka thyer heshtjen dhe është rikthyer tashmë të flasë për shkarkimin e tij nga Tottenham, me të cilin shkoi sezonin e kaluar deri në finalen e Champions League.
“Kishim njëherësh sfida të vështira dhe suksese entuziazmues. Urimet më të mira për të ardhmen. Jam i bindur që fatet tona do të takohen sërish në të ardhmen”, deklaroi ish-trajneri i Spurs-ave, i zëvendësuar nga Jose Mourinho.
“Unë kam dhënë më të mirën time për të realizuar objektivat që mu kërkuan në takimin tonë të parë”, u shpreh argjentinasi, deklarata e të cilit kishte nisur me një falenderim për drejtuesit e lartë të Tottenham.
“Dua të falenderoj pronarin e klubit Joe Lewis dhe presidentin Daniel Levy për mundësinë që më dhanë për të qenë pjesë e Tottenham. Dua të falenderoj gjithashtu të gjithë ata që takova te Tottenham, klubin, stafin dhe futbollsitët gjatë këtyre viteve. Në fund, dua të falenderoj tifozët e këtij klubi, aq fantastik me mbështetjen e tyre”.
