Argjentina është tronditur nga skandali i arrestimit të dy futbollistëve të skuadrës së Atletiko Hurakanit për përdhunimin e një vajze.
Mediat argjentinase bëjnë me dije se dy lojtarët janë Federiko Marin dhe Valter Perez, të dy 21 vjeç. Ata u arrestuan në Kordoba ditën e sotme, pasi dje viktima denoncoi ngjarjen. Policia mbërriti në njërin prej hoteleve, ku sekuestroi telefona dhe disa prezervativë. Sipas Kodit Penal argjentinas, një vepër e tillë kriminale dënohet nga 6-15 vite burg.
Klubi i Atletiko Hurakanit reagoi pas këtij lajmi dhe premtoi se do të marrë të gjitha masat e nevojshme nëse dy lojtarët e klubit shpallen fajtorë.
“Duke marrë shkas nga ngjarja e fundit, klubi i Atletiko Hurakanit konfirmon qëndrimin e tij kundër çdo akti kriminal ndaj femrave. Nëse versionet e mediave konfirmohen, klubi nuk do të hezitojë të zbatojë të gjitha masat më të ashpra disiplinore ndaj personave të përfshirë”, shkruhet në komunikatën e Atletiko Hurakanit.
