Brenda ditës së sotme të gjithë lojtarët e Milanit do të duhet të jenë në Itali. Përjashtim bën vetëm Zlatan Ibrahimoviçi që ka kërkuar leje për të qëndruar në Suedi deri kur vendimi për rikthimin në stërvitje nga ana e klubeve të jetë zyrtar.
Pas zgjedhjes së 38- vjeçarit nuk fshihet asnjë mosmarrëveshje me klubin, por thjesht dëshira e profesionistit për t’u stërvitur dhe diçka e tillë është në kushtet ideale në Suedi ku nuk ka masa shtrënguese të lidhura me Koronavirusin.
Gjatë gjithë ndalesës së Serisë A, sulmuesi është stërvitur me ekipin e Hamarbit, ku ka edhe pronësinë e 25 për qind të aksioneve. Milani nuk ka bërë kurrfarë rezistence ndaj kërkesës së Ibrës, aq më tepër që duke qëndruar në vendlindje, ai do të jetë në formë ideale kurdo që të vendoset për ta rikthyer në Itali.
