Përmirësimi i organikës është refreni i Milanit në këto ditë të nxehta. Emrat e shqyrtuar janë të shumtë, por sinjale të qarta kanë ardhur nga Mark Roka i Espanjolit dhe Emerson Rojal i Barcelonës. Në fakt, menaxherët e futbollistëve në fjalë kanë qenë dje të pranishëm në “Casa Milan” dhe nuk përjashtohet mundësia që dyshja të vishet kuqezi gjatë verës.
Sa i përket mbrojtësit katalanas, ai kushton 30 milionë euro, edhe pse është 21 vjeç. I huazuar këtë sezon te Sevija, ai ka treguar cilësitë e tij dhe nëse Barça nuk bindet, djaloshi duket i destinuar për t’u vënë në shitje.
Sa i përket Mark Rokës, ai do të largohet nga Espanjoli pasi këta të fundit kanë siguruar rënien nga kategoria. Mesfushor qendre me tipare shkatërruese, 23- vjeçari duket përforcimi i duhur në raportin cilësi-kosto duke qenë se kushton “vetëm” 15 mln euro.
