Pas një vere të turbullt dhe një raporti të nderë me klubin, që për pak solli ndarjen e bujshme të Lionel Messi me Barcelonën, “Pleshti” ka ndryshuar qëndrim. Me tone dhe fjalë të ndryshme nga intervista e fundit e tij, ku sulmoi drejtuesit “katalunjas”, sulmuesi argjentinas është tërhequr duke bërë edhe një “mea culpa”. Në faqet e të përditëshmes katalunjase “Sport”, ai ka shtrirë dorën e pajtimit.
“Pas shumë hidhërimi dua t’i jap fund kësaj çështjeje. Duhet të bashkohemi në emër të Barcelonës dhe të mendojmë se më e mira duhet të vijë ende. Marr përgjegjësi për gabimet e mia, por gjithçka e kam bërë për një Barcelonë më të fortë. Tifozëve iu them se nëse kam bërë diçka që i ka ofenduar, e kam bërë këtë duke menduar gjithmonë vetëm për të mirën e klubit”, ka thënë Leo Messi. Sulmuesi kërkoi largimin nga Barcelona, por pasi kuptoi se kjo ishte e pamundur, tashmë kërkon të rifitojë sërish rolin e liderit në skuadrën “blaugrana”.
