Pa Messin në fushë, Barcelona zhgënjen duke mos shkuar më shumë se një barazim 1-1 përballë Eibar. Blaugranët mbyllin një vit të errët, nga më të vështirët në vitet e fundit, pas 15 ndeshjeve e shohin veten në vendin e 6-të në kuotën e 25 pikëve, 7 më pak se Atletico Madrid kryesuese por ekipi i Simeone ka dy ndeshje më pak. Në “Camp Nou” gjithçka nisi keq teksa Braithwaite humbi një 11-metërsh që në minutën e 8-të. Në të 25-tën sistemi VAR i anuloi një gol për pozicion jashtë sulmuesi danez duke bërë që dy ekipet ti drejtoheshin dhomave të zhveshjes në barazim pa gola. Me fillimin e pjesës së dytë, Kike kaloi Eibar në avantazh në minutën e 67-të ndërsa dhjetë minuta më pas ishte Dembele që barazoi rezultatin në 1-1.
Barcelona humbi jo vetëm dy pikët në këtë takim por edhe shërbimet e Philippe Coutinho. Sulmuesi brazilian u largua nga fusha i dëmtuar në minutën e 66-të dhe sipas mediave spanjolle bëhet fjalë për një dëmtim të meniskut të jashtëm në gjurin e majtë. Nëse ky dëmtim konfirmohet edhe nga rezonanca magnetike, Coutinho pritet ti nënshtrohet një ndërhyrje kirurgjikale. Ky është dëmtimi i dytë për brazilianin brenda një harku kohorë të shkurtër, pak kohë më parë pësoi një dëmtim të ngjashëm gjatë “El Clasico” kundër Real Madrid.
