Mançester Siti nuk ka hequr dorë nga gara për të firmosur me Lionel Mesin në fund të sezonit dhe është ende i interesuar për të siguruar shërbimet e kampionit të Barcelonës. Skuadra e Pep Guardiolës ishte favorite për të siguruar firmën e sulmuesit argjentinas verën e shkuar, kur ai shfaqi dëshirën për t’u larguar nga “Camp Nou”. Por, pasi Barcelona këmbënguli për të mos e lënë të lirë kapitenin 33-vjeçar, interesi i “Qytetarëve” u duk sikur u zbeh.
Nga ana tjetër, PSG nisi manovrat e saj për transferimin e tij dhe drejtori sportiv Leonardo, trajneri i ri Mauricio Poçetino, por edhe miqtë e Mesit, Nejmar dhe Angel Di Maria, bënë përpjekjet e tyre për ta joshur “Pleshtin” në Paris. Francezët mendohet se kanë ofruar 75 milionë euro këtë javë për të siguruar shërbimet e tij, por sipas “ESPN”, Siti është thjesht duke marrë kohën e tij dhe do të bëjë një lëvizje për Mesin gjatë muajit mars ose prill. Dhe burimet e tyre besojnë se kjo strategji e qetë e monitorimit të situatës së numrit 10 do t’i bëjë një përshtypje më pozitive lojtarit, i cili nuk e ka mohuar kurrë dëshirën që një ditë të punojë përsëri me Pep Guardiolën. Njëri prej tyre tha: “PSG po bën një gabim me strategjinë që po përdor.
Leos nuk i pëlqen e gjithë zhurma në media, madje akoma më pak lloji i komenteve që është bërë për të”. Një nga komentet që zemëroi edhe trajnerin e Barcelonës, Ronald Kuman, erdhi nga bashkatdhetari i Mesit, Di Maria, kur tha: “Ka një shans të madh që Mesi të vijë. Ne duhet të jemi të qetë dhe t’i lëmë gjërat në zhvillimin e tyre”. Por Kuman, skuadra e të cilit do të presë PSG-në në ndeshjen e parë të 1/ 8-ave të Champions-it javën e ardhshme, u kundërpërgjigj: “Kjo është një mungesë respekti. Është e gabuar të thuash një gjë të tillë dhe kjo vetëm e nxeh përballjen e Champions-it akoma më shumë. Nuk është e ndershme. Nuk mendoj se është e respektueshme ndaj Barcelonës që të flitet për një lojtarin tonë.
Ata flasin shumë për Leon. Ai është një futbollist i Barcelonës dhe ne kemi një ndeshje për të luajtur kundër tyre”. Siti nga ana tjetër, po përdor një strategji më pak agresive. Duke qenë se lojtari ka hyrë në 6 muajt e kontratës në “Camp Nou”, ai është i lirë që të negociojë me klubet e tjera nëse dëshiron. Në listën e të interesuarave, përveç Sitit dhe PSGsë është natyrisht edhe Interi.
