Prezenca e Zlatan Ibrahimoviç në festivalin e Sanremos është komentuar shumë duke parë dhe gjendjen jo të mirë që po kalon Milani në kampionat dhe duke e akuzuar atë në një farë mënyre se ka “braktisur” ekipin në momentin më deçiziv të kampionatit.
Një koment ka ardhur dhe nga ish-trajneri i Tiranës, Ze Maria i cili në një prononcim për mediat italiane, është shprehur se futbollistët mund të këndojnë në dush, por Ibra merr leje për të kënduar në Sanremo.
“Mua më pëlqen futbolli gjithashtu më pëlqen këndimi. Lojtarët mund të këndojnë edhe në dush. Lojtarët janë të detyruar të luajnë në fushë, këndimi bëhet në dush. Nuk jam dakord me këtë që ka bërë, por përderisa Milani ia lejon, ai mund të bëjë ç’të dojë. Nuk është se ka kaluar dhe një moment të mirë në fushë këto kohët e fundit”, u shpreh Ze Maria.
