Prej një muaji Vllaznisë i mungon mesfushori Herald Marku, i cili luan sezonin e dytë në Shkodër dhe është kthyer në një prej titullarëve të padiskutueshëm të skuadrës. Dëmtimi në ndeshjen ndaj Laçit në fillim të muajit shkurt rezultoi më i rëndë nga sa ishte parashikuar.
Marku pësoi një tërheqje muskulore dhe mendohej se pas tri javësh do të ishte gati. Mirëpo, kjo nuk ka ndodhur tashmë dhe lojtari vazhdon fazën e riaftësimit. Sipas të gjitha gjasave, në fundjavën tjetër mesfushori mund të jetë gati për trajnerin Brdariç, ndërsa do të humbë tashmë edhe ndeshjen e së hënës me Kukësin.
Nga ana tjetër, ka shpresa se mbrojtësi i majtë maqedonas, Aleksandër Isaevski, mund të kthehet në dispozicion që në ndeshjen e radhës. Ai u dëmtua në kavilje, por edhe dje nuk ishte pjesë e stërvitjes. Gjithsesi, sot do të mësohet më tepër nëse Isaevski do të rikthehet për Kukësin apo jo.
