Milani sivjet po bën një sezon shumë të mirë dhe së fundmi, pavarësisht disa ndalesave të pamenduara, si rrjedhojë edhe e shumë dëmtimeve, po tregohet më i fortë sesa emergjenca dhe po lufton për të blinduar sa më shpejt që të jetë e mundur zonën Champions, e cila do të mbushte jo pak arkat e klubit.
Gjithsesi, duket sikur pa garancinë e fazës së grupeve, rinovimet e disa prej liderëve të skuadrës do të jetë e vështirë që të bëhen, duke parë edhe kërkesat në rritje që kanë futbollistë si Hakan Çalhanoglu apo Xhanluixhi Donaruma etj. Gjithsesi, duke mbetur nga çfarë raportojnë mediat franceze, portieri i cili është në skadencë kontrate më 30 qershor, i ka gati 10 milionët në vit që kërkon, nëse firmos me PSG-në. Këta të fundit kanë nisur një sulm frontal, duke biseduar edhe me menaxherin Mino Raiola, ndaj e duan me çdo kusht gjigantin e portës.
Por, sërish i frikshëm është edhe lajmi nga Spanja: “Reali i Madridit ka vënë në shënjestër Frenk Kesin”. Pikërisht kështu, gjigantët iberikas duan shërbimet e mesfushorit afrikan për sezonin e ardhshëm. Kesi, lideri i ri kuqezi, ka një kontratë deri në vitin 2022 me Milanin, por bisedime për rinovim nuk ka, ndaj Reali kërkon ta joshë duke i ofruar 7 milionë euro në sezon.
