Pas grushtimit dhe topit nga portieri rival që si me magji shkoi në këmbët e tij, duke e depozituar në rrjetë, mund të kenë kaluar jo më shumë se dy sekonda, por kaq mjaftoi që Robert Levandovski të shndërrohej në një të pavdekshëm. Në minutën e 91-të të sfidës së luajtur në “Allianz Arena”, e gjithë historia e Bundesligës ndryshon, e gjithë historia e futbollit gjerman i përulet bomberit polak, i cili vulosi shifrat finale në 5-2 dhe mbi të gjitha dërgoi vetën në kuotën e 41 golave në kampionat, duke u ulur i vetëm më poltronën e rekordit e cila deri pak ditë më parë i takonte Gerd Mylerit.
Për Levandovskin nuk mund të kishte një fund sezoni më të bukur, ndaj edhe festa personale, me bluzën e hequr dhe duke i treguar muskujt botës ishte më se e kuptueshme, pasi nuk ndodh çdo ditë që të thyhet një rekord gjysmëshekullor, një moment që i dha start edhe festës madhështore me birra dhe ngritjen e trofeut.
EUFORIA E LEVËS – Pas ndeshjes, gëzimi i 32-vjeçarit ishte qartësisht i lexueshëm. Këtë arritje ai e priste prej shumë kohësh, por ia arriti, “in extremis”, si një skenar filmi hollivudian. “Është një ndjesi tepër e bukur, jam më shumë se i gëzuar, – shprehet “Panceri” i Bundesligës. – Është diçka e veçantë, arritja më e madhe në karrierën time. Dua të falënderoj të gjithë shokët dhe stafin teknik që më kanë ndihmuar në këtë rekord. U jam pa fund mirënjohës”. Në fund polaku komentoi edhe fjalët që i tha portierit të Augsburgut, i cili ia bëri të vështirë jetën. “Je i pabesueshëm, pikërisht sot e gjete…(qesh) Por, në fund ia dola dhe ai ishte i pari që më kërkoi foto pas ndeshjes dhe më uroi. Do ta mbaj mend gjatë këtë ditë, pasi është një rekord i pabesueshëm”. Ndërkohë, nuk mungoi edhe urimi dhe foto me gruan e Gerd Mylerit, e cila morri fanellën e firmosur nga Levandovski me mbishkrimin “Forever Gerd”. Një moment i veçantë ky për polakun, i cili vlerësoi shumë fjalët zonjës Myler për rekordin e thyer. “Gerd ishte shumë i lumtur nëse Robert do e thyente këtë rekord. Ai e meriton plotësisht”, ishte shprehur zonja Myler para pak ditësh, ndaj në fund nuk mund të mungonin edhe përqafimet mes tyre.
E ARDHMJA – Ndërkohë, duke parë edhe spekulimet e fundit mediatike për Levandovskin, në fund nuk mund të mungonte edhe një pyetje mbi të ardhmen e tij te Bajerni i Mynihut. “Këto lajme i shpikni ju gazetarët. Unë gjithmonë kam deklaruar se jam i lumtur në Mynih dhe dua të fitoj ende shumë trofe këtu. Ky klub më ka dhënë shumë dhe unë nuk ia kam shpërblyer ende siç duhet”, përfundoi rekordmeni Robert.
