Ish-mbrojtësi i Tiranës dhe Laçit, David Domgjoni mori për herë të parë ftesë nga përfaqësuesja e Kosovës pas paraqitjeve pozitive që zhvilloi këtë sezon në Turqi me skuadrën e Menemensporit.
24 vjeçari në një intervistë për “Gazeta Blic Sport” u shpreh mjaft i lumtur për këtë arritje duke u shprehur se ky do të jetë për të vetë fillimi i një rrugëtimi.
“Pa dyshim që është emocion, nder dhe krenari, në të njëjtën kohë do të kemë mundësinë të japë kontributin tim në kombëtaren e Kosovës. Gjithashtu do të japë maksimumin tim që kjo ftesë të jetë vetëm fillimi i këtij rrugëtimi.
“Në radhë të parë dua t’i falënderojë për mesazhet dhe mbështetjen e vazhdueshme që kam marrë nga “Dardanët” dhe ju premtojë që çdo mbështetje e tyre do të jetë një motiv më shumë për të vazhduar përpara këtë rrugëtim dhe për t’i bërë ata krenar duke dhënë gjithçka nga vetja”, u shpreh mbrojtësi.
Domgjoni ka një karrierë të pasur në Shqipëri, duke luajtur për disa vite me Tiranën, Kastriotin dhe së fundmi Laçin para se të transferohej tek turqit e Menemensporit.
Gjithashtu 24 vjeçari është aktivizuar dhe për Shpresat U17 dhe U19 të Shqipërisë, por u thirr nga tekniku Shaland në prag të miqësoreve që Kosova do të luajë në fillim të qershorit.
