Milani është me një këmbë jashtë Ligës së Kampioneve pasi vetëm një kombinim rezultatesh mund të sjellë vazhdimësinë e mëtejshme në këtë turne ku kuqezinjtë deri tani kanë siguruar 1 pikë në 4 ndeshje. Barazimi 1-1 ndaj Portos shërbeu vetëm sa për të hequr shifrën zero nga kolona e pikëve, pasi praktikisht nuk mjafton që kuqezinjtë të bëjnë hapa para dhe mbeten në fundin e grupit.
Sipas ish-kapitenit të kuqezinjve, Masimo Ambrozini, barazimi i sotëm ishte rezultati më i drejtë i mundshëm për atë që shfaqi skuadra.
“Ka keqardhje për rezultatin, por është i drejtë për atë që tregoi Porto në pjesën e parë. Milani reagoi në pjesën e dytë dhe Porto arriti ta përballonte. Sipas meje, Milani më shumë se kaq nuk mund të bënte. Zëvendësimet i mundësuan Milanit që të kthehej në ndeshje. Por sforcimi që bëri ishte shumë i lartë që të mendohej se mund të arrihej diçka më shumë”, tha Ambrozini pas sfidës.
