Shkëlzen Gashi ka lënë pas krahëve vitet më të suksesshme të karrierës së tij, por gjithsesi duket se nuk e ka harruar nuhatjen para portës kundërshtare. Futbollisti i cili në të kaluarën ka qenë pjesë e përfaqësueses shqiptare, sot ishte protagonisti kryesor në fitoren 2-1 të Arau ndaj Kriens në kategorinë e dytë zvicerane ku luan prej dy sezonesh.
Gashi shënoi të dy golat e kësaj ndeshje për skuadrën e tij, nga një në secilën pjesë loje. I pari ishte me një diagonale të bukur, ndërsa i dyti ishte ai i një nuhatësi zone, pasi u shfaq me portën bosh dhe vetëm u desh të shtynte sferën në rrjetë.
E megjithatë, festimi i këtij goli të dytë u mbyll me një… zëvendësim. Trajneri vendosi që Gashi të dilte menjëherë nga fusha e lojës, duke menduar që të kursente lojtarin për sfidat e tjera në kampionat, ku Arau pas këtij suksesi gjendet në vendin e tretë në renditje, vetëm 2 pikë larg vendit të parë.
Gashi ka arritur të shënojë 5 gola e të dhurojë 1 asist në ndeshjet e luajtura deri tani në këtë sezon.
