Derbi i kryeqytetit, sfida më e rëndësishme e futbollit shqiptar, do të zhvillohet në “Air Albania”. Klubi i Partizanit, si organizator i derbit të tretë sezonal, ishte në dilemë se ku do të organizonin sfidën me Tiranës, dëshira që kjo përballje të luhej në kompleksin e tyre të ri ishte e fortë, pavarësisht se klubi i Tiranës, FSHF dhe Policia e Shtetit ishin kundër. Në fund, Partizani iu dorëzua vullnetit të tifozëve, duke pranuar kërkesën e tyre që ky derbi të luhej në “Air Albania”.
Me anë të një postimi në faqen zyrtare, Partizani ka bërë me dije se takimi me Tiranën do të luhet ditën e hënë, më 6 mars në orën 19:00: “Klubi zyrtarizon stadiumin “Air Albania” ku do të zhvillohet takimi Partizani – Tirana i vlefshëm për javën e 24 të Kampionatit. Duke parë interesimin e madh të tifozerisë së kuqe për të qenë sa më e shumtë prezent në këtë ndeshje të rëndësishme, klubi ka vendosur që ndeshja derbi të luhet në stadiumin “Air Albania”, lexohet ndër të tjera në reagimin e klubit të kuq.
