Inter vijon përgatitjet për sezonin e ri, me zikaltërit që kanë lëvizur pak në merkaton në hyrje, mbeten në pritje të një sulmuesi, që pritet të zbarkojë në fund të gushtit. Nga Milano janë larguar disa emra me peshë si Onana, Brozivic, Skriniar dhe Lukaku, por ky fakt nuk i pengon drejtuesit të blindojnë arkitektin e këtij ekipi, Simone Inzaghi. Rinovimi i kontratës së trajnerit u diskutua shumë në fund të sezonit që lamë pas, madje firma pritej përpara finales së Champions League, por palët nuk e kishin me nxitim pasi prej kohësh kishin gjetur një akord verbal.
Sipas La Gazzetta dello Sport, palët vijojnë të jenë në kontakt në lidhje me këtë temë, firma mbi kontratën e re pritet të vijë përpara startit të sezonit. Sipas të përditshmes italiane, Inzaghi dhe Inter do të zgjasin bashkëpunimin ndërmjet tyre deri në 2025, pra do të rinovojnë edhe për një tjetër vit. Me kontratën e re, Inzaghi pritet të ketë bonuse në rritje në rast suksesi në kampionat dhe Champions.
