Jonathan David është nënshkrimi i parë për Juventusin e Damien Comollit. Pika e kthesës për marrëveshjen me sulmuesin kanadez ishte gjatë mbrëmjes së djeshme dhe mëngjesit të sotëm, menjëherë pas ndeshjes së luajtur nga bardhezinjtë në Miami kundër Real Madridit (humbje 1-0).
Pengesa e fundit e komisioneve të agjentëve (të cilët u përputhën me dëshirat e lojtarit) u kapërcye dhe për këtë arsye sulmuesi që u largua nga Lille si transferim i lirë tani është gati të bëhet lojtar i “Zonjës” në të gjitha aspektet. Grupi i stërvitur nga Tudor do të kthehet nga Shtetet e Bashkuara nesër (nisja sonte në mbrëmje), teksa ‘makina organizative’ për mbërritjen në qytet dhe vizitat mjekësore të blerjes së re është vënë në lëvizje në ‘Continassa’.
David do të fitojë 6 milionë euro në sezon plus 2 mln euro bonuse. Juve kishte kohë që kishte gjetur një mirëkuptim me lojtarin, por iu desh të punonte pak më shumë për të gjetur një marrëveshje me agjentët.
Ardhja e kanadezit (i cili vitin e kaluar shënoi 25 gola dhe 12 asiste në 49 ndeshje me Lille) nuk përjashton mbërritjen e një emri të dytë të madh në sulm, por tani Juve do të duhet të lirojë hapësirë (teknike dhe ekonomike) duke sqaruar mbi të gjitha pozicionin e qendërsulmuesve në skuadër, Vlahovic dhe Milik, të dy jashtë projektit.
