Sezoni në sportin e mundjes është hapur me turneun Mbarëkombëtar “Abedin Lame”, i zhvilluar këtë të shtunë në Pallatin e Sportit “Asllan Rusi”. Në aktivitetin që mban emrin e ish-kampionit të mundjes për vite me radhë dhe ish-trajner i Partizanit, morën pjesë dhjetë skuadra nga Shqipëria, Kosova, Maqedonia dhe Mali i Zi.
Tirana ishte skuadra më e mirë e aktivitetit, me bardheblutë që ishin fitues si në stilin klasik, ashtu edhe në stilin e lirë, ku mblodhën më tepër pikë se të gjitha ekipet e tjera. Në stilin klasik, bardheblutë triumfuan në 9 nga dhjetë peshat në të cilat u konkurrua, ndërsa Klodian Shehu u shpall sportisti më i mirë i aktivitetit në këtë stil.
Në mundje të lirë, Tirana fitoi në 3 pesha, ashtu si edhe ekipi i Lirisë së Shkupit, ndërsa sportisti më i mirë ishte Emiliano Çekrezi, një tjetër bardheblu. Konkurrimi për femra u dominua nga sportistet nga Kosova. Konkurrimi që nisi prej orëve të para të mëngjesit përfundoi vetëm pas mesditës, kur u shpërndanë edhe medaljet dhe trofetë për fituesit.
