Empolit i mjaftoi një gol i sulmuesit Alfredo Donnarumma për të mposhtur 1-0 Pescarën dhe për ta thelluar në 5 pikë avantazhin ndaj Froninones ndjekëse në Serinë B. Skuadra nga krahina e Lazios ngeci në një barazim pa gola ndaj Ternanës së vendit të fundit dhe tashmë rrezikon të humbasë edhe vendin e 2-të që të siguron ngjitjen direkte në elitën e futbollit pasi Palermo që renditet e treta ka një pikë më pak por edhe një ndeshje më shumë për të luajtur.
Në Siçili, Palermo shkatërroi Carpin me rezultatin 4-0 falë 3-golëshit të Coronados dhe finalizimit të La Guminas. Pa Frederic Veselin që vazhdon të jetë i dëmtuar Empoli në transfertën ndaj Pescarës që humbi edhe një 11-metërsh në këtë ndeshje, regjistroi fitoren e 3-t radhazi. Vijon forma e mirë e Virtus Entellas që triumfoi 1-0 në transfertën ndaj Cremoneses.
Asnjë minutë gjithsesi për Azdren Llullakun që e ndoqi të gjithë ndeshjen nga stoli, ndërsa Aliji është i grumbulluar nga kombëtarja kuqezi për sfidën ndaj Norvegjisë. 90 minuta në stol edhe për Armando Vajushin në barazimin 0-0 që regjistroi Avellino përballë Pro Vercellit, ish skuadrës së sulmuesit shkodran.
