Ruud van Nistelrooy mendoi se Cristiano Ronaldo po “ëndërronte me sy hapur” kur portugezi, atëherë i ri në moshë, i tha se synonte të bëhej futbollisti më i mirë i planetit te Manchester United.
Ronaldo shënoi në ndeshjen e dhjetë radhazi në Champions League, duke thyer rekordin e ish-shokut të skuadrës Van Nistelrooy, që kishte shënuar në nëntë ndeshje radhazi.
Ish-sulmuesi holandez pranon se nuk kishte ndonjë simpati të madhe për “CR7”, kur ky i fundit mbërriti në “Old Trafford” dhe mendonte se ishte një “lodër” e ish-ndihmësit të Ferguson, Quieroz.
“Ai na tha se donte të bëhej lojtari më i mirë në botë. Në fillim i thashë: Ok, djalë, vazhdo ëndërro me sytë hapur. Në fillim mendova se vetëm Queiroz e pëlqente dhe e donte në ekip, por mënyra si punonte dhe si kombinonte talentin me përkushtimin e bëri menjëherë të rëndësishëm për Manchester United,” – tregoi Van Nistelrooy.
“Në fillim nuk kisha një mendim të mirë për të, por tani jam i bindur që Ronaldo është fantastik,” – përfundoi holandezi.
