Një episod aspak i këndshëm ka ndodhur në Marok, ku ekipi i Raxha Kasablankës, është sulmuar nga një grup tifozësh të tyre, pas humbjes 3-1 në transferta ndaj Rapide Oued Zem. Incidenti ndodhi kur lojtarët po ktheheshin me autobus nga kjo transfertë, 160 kilometra larg Kasablankës.
Tifozët hodhën gurë dhe granata me tym ndaj lojtarëve, të inatosur për këtë humbje, që tashmë i mban larg luftës për të fituar titullin kampion. Video është bërë virale në rrjetet sociale, ndërsa lojtarët shfaqen të shokuar. Disa donin edhe të denonconin autorët e kësaj dhune. Të tjerë, me kokën të mbuluar me gjak, ftonin tifozët të ishin të butë, teksa i kujtonin sakrificat që kishin bërë për Raxha Kasablankën.
