Zviceranët janë shprehur kritikë për këngën zyrtare të Kupës së Botës që do të shoqërojë përfaqësuesen e tyre. Kënga me titullin “Ole, Ole” e DJ Antoine ka shkaktuar polemika në media dhe tek qytetarët, të cilët mendojnë se nuk ka lidhje me sportin, pasi nxit konsumimin e alkoolit dhe flet më shumë për seksin.
Madje e kanë cilësuar si të shthurur, me një tekst ku përfshin stereotipa seksiste dhe nxit konsumin e alkoolit dhe nuk ka të bëjë me futbollin- argumentojnë mediat zvicerane.
Federata ka njoftuar se kënga do promovohet për herë të parë në ndeshjen miqësore që Zvicra do të luajë ndaj Japonisë në Lugano më 8 qershor. Zëdhenësi i saj, Marco von Ah. ka theksuar se kënga është pranuar edhe nga iTunes, pasi është klasifikuar si e padëmshme për të miturit.
“Nuk duhet që ta mbivlerësojmë tekstin por as t’a trajtojmë fjalë për fjalë. Natyrisht, nuk do të pranonim thirrje për konsumin e alkoolit por kënga ka të bëjë më shumë për dehjen për lumturi, flet për pasionin dhe dashurinë për jetën. Në fund audienca do të vendosë nëse e pëlqen apo jo?”- i tha ai gazetarëve.
Ndërsa nga ana tjetër ka reaguar edhe vetë autori i saj DJ Antoine, i cili është përpjekur t’u përgjigjet kritikëve.
“Kjo këngë ka për qëllim të përhapë lumturi dhe një humor të mirë. Është moderne, nëse dëgjoni ‘Despacito’ për shembull, duket e ngjashme. Gjithashtu edhe kënga jonë ka të bëjë me dashurinë, pasionin dhe të ndjerit mirë. Të gjitha këto lloj emocione i përkasin futbollit. Mendoj se është thjesht një këngë rastësore”- ka thënë ai.
Ndeshjen e parë në Rusi, Zvicra do ta luajë ndaj Brazilit më 17 qershor.
