Paris Saint Germain (PSG) njoftoi këtë të enjte se Neymar është kthyer edhe njëherë në Brazil. “Për shkak të mungesës së tij për ndeshjen në stadiumin e Caen, Neymar ka qenë i autorizuar të kthehet në Brazil për të vazhduar me programin e tij të punës”, tha klubi francez. PSG gjithashtu shpjegoi se, para se të fluturonte në vendin e tij, ylli brazilian mori pjesë të enjten në stërvitjen e skuadrës, ku ishte së bashku me shokët e tij, madje filloi dhe përgatitjet fizike dhe ato me topin. Nga ana tjetër, Thomas Tuchel, trajner i ri i PSG, do të prezantohet të dielën.
Neymar, lojtari më i shtrenjtë në botë (PSG e bleu nga Bracelona për 222 milionë euro në verën e vitit 2017), më 25 shkurt vuajti nga një thyerje e kockës së pestë metatarsale gjatë ndeshjes kundër Marseille, ku më pas u detyrua që të operohej në Brazil, gjë që nuk e ka lejuar që të luajë me ekipin e tij këtë sezon, ku shpreson që të jetë në maksimumin e tij për Botërorin me “kanarinat”.
Thomas Tuchel do të prezantohet si trajneri i ri i PSG-së këtë të diel duke zëvendësuar spanjollin Unai Emery, sipas njoftimit të klubit francez, i cili tha se në këtë ceremoni do të marrë pjesë dhe presidenti i parisienëve, Nasser Al-Khelaifi. Tuchel, 44 vjeç, u njoftua të hënën më 14 maj si trajneri i PSG, ekip të cilin do ta trajnojë për dy sezonet e ardhshëm.
