Fituesi i finales së Kupës së Shqipërisë që do të luhet sonte në “Elbasan Arena”, do të ketë privilegjin që të marrë këtë trofe nga presidenti i Republikës, Ilir Meta. Takimi do të zhvillohet sonte në orën 19:00 në stadiumin e kuqezinjve. Burime pranë presidencës konfirmojnë se ish kreu i LSI-së, Meta do të jetë i pranishëm në tribunë së bashku me drejtuesit e klubeve dhe në fund të takimit do të zbresë në fushën e blertë për t’i dorëzuar Kupën triumfuesit të kësaj sfide.
Skënderbeu kërkon që të marrë trofeun e dytë për këtë sezon dhe për të parën herë të ngrejë Kupën në historinë e tij. Nga ana tjetër Laçi, që është fitues dy herë i këtij komepticioni kërkon me patjetër që të mos e mbyllë këtë sezon pa një trofe. Kupa është parë gjithmonë si objektiv primar për kurbinasit, të cilët kanë qenë katër herë finalistë të kësaj gare.
