Kukësi është një ndër ekipet që ka lëvizur më shumë në këtë merkato. Numri i afrimeve te verilindorët ka shkuar në tetë, ndërkohë që ende asgjë nuk është mbyllur, kjo pasi drejtuesit e klubit po mendojnë për afrime të tjera.
Nënkampionët kanë “rrëmbyer” dy lojtarë nga Kamza. I pari ishte sulmuesi Sebino Plaku, ndërsa i dyti mbrojtësi pogradecar, Vangjel Zguro. Këta nuk janë të vetmit që janë larguar nga Kamza te Kukësi, pasi një tjetër lojtar është në gjurmët e dy të parëve.
Bëhet fjalë për sulmuesin fierak, Realdo Fili. 22-vjeçari duket se do mbyllë shumë shpejt bisedimet me drejtuesit e Kamzës. Ai është vënë nën vrojtim nga drejtuesit e Kukësit dhe shanset janë të mëdha, që fieraku të firmosë me verilindorët sapo të ketë shpallur “divorcin” me kryeqytetasit.