Marouane Fellaini ka thënë se në Angli po e trajtojnë si të ishte një “vrasës”.
Mesfushori i Manchester Unitedit pohoi se nuk është i sigurt nëse do të mbetet në Old Trafford.
“Për mua thonë se jam një lojtar agresiv, një vrasës. Unë jam fanatik, ekipi ka arritur fitore të vështira, dhe në disa raste u shndërrova në kriminel. Çfarë duhet të bëj nëse dikush më tërheq për flokë? Gjithçka tingëllon si një shaka, por është me të vërtetë e dhimbshme”, u tha Fellaini mediat belge.
Belgu deri më tani ka pasur 98 paraqitje dhe ka shënuar 11 gola
Reprezentuesi belg gjithashtu u ankua për trajtimin që i bënë në ligën elitare angleze.
“Sezonin e kaluar unë u pezullova pas derbit me Manchester Cityn, pasi dyshohej se godita kokën e Sergio Agueros. Ai qëndroi para meje dhe pastaj ra si i vdekur. Lojtaret shpesh përpiqen të më provokojnë, por ju e dini se si kam marrë kartonët e verdhë gjatë sezonit të kaluar? Vetëm katër në 45 ndeshje “, ka shtuar futbollisti belg.
Më parë këtë vit, Manchester United ka aktivizuar klauzolën për zgjatjen e kontratës së 30-vjeçarti edhe për një vit tjetër, por është e paqartë nëse do të qëndrojë në Old Trafford.
“Ata më bënë një ofertë, por mund të ma bëjnë një tjetër. Unë nuk e di nëse do ta pranojë. Ne do ta shohim”, ka thënë Fellaini.
Fellaini në këtë sezon ka luajtur nëntë ndeshje në Ligën Premier dhe ka shënuar tre gola dhe aktualisht po shërohet nga një dëmtim në gju.
