Një nga momentet më emocionuese të këtij viti që po lëmë pas ishte ceremonia e lamtumirës së Lorik Canës.
Ndonëse u tërhoq menjëherë pas përfundimit të Kampionatit Europian, kapiteni legjendar i Shqipërisë i dha lamtumirën zyrtare futbollit të luajtur më 9 tetor, në përballjen me Italinë në “Loro Boriçi”.
Nën një atmosferë fantastike të krijuar në shkallët e stadiumit, Cana zbriti në fushën e blertë, së bashku me djalin e tij dhe u përshëndet për herë të fundit me tifozët, që kishin thërritur kaq shumë emrin e tij në kor.
Lorik Cana iu bashkua Kombëtares shqiptare në qershorin e 2003-shit, kur skuadra drejtohej nga gjermani Hans Peter Brigel, ndërsa luajti për më tepër se 13 vite, për ta mbyllur me plotësimin e ëndrrës së tij dhe gjithë shqiptarëve, pjesëmarrjen në Kampionatin Europian ‘Francë 2016’.
Cana luajti 93 takime me Kombëtaren shqiptare, ndërsa që nga viti 2011 mbajti edhe shiritin e kapitenit.
