Jordi Alba, mbrojtësi i majtë i Barcelona-s, ia ka atribuuar trajnerit Ernesto Valverde fitoren e rëndësishme 3-0 të arritur në “El Clasico”-n e luajtur në “Santiago Bernabeu”: “Trajneri na jep shumë siguri, na lë të lirë të luajmë sipas ritmeve që kemi”, ka thënë spanjolli.
“Jemi më të organizuar dhe më të bashkuar. Kundërshtarët e kanë të vështirë të na çajnë dhe ku kjo ndodh, Marc (ter Stegen) është gjithmonë gati. Loja jonë sulmuese nuk është më spektakolar si në sezonin e kaluar kur kishim tre sulmues, por tani kemi më shumë liri dhe mund të jemi më të paparashikueshëm”.
Fitorja e marrë në fushën e Real Madrid ka ndihmuar Barcelona-n të shkojë në kuotën e 45 pikë në renditjen e kampionatit spanjoll. Nëntë pikë më shumë se vendi i dytë që mbahet nga Atletico Madrid dhe 14 nga Real-i, që ka një ndeshje për të rikuperuar.
