Legjenda e Arsenalit, Robert Pires, ka përsëritur dëshirën e tij për t’u kthyer në klub një ditë dhe të punojë së bashku me trajnerin Arsene Wenger. Ish-futbollisti francez aktualisht është ambasador për klubin dhe “Fondacionin Arsenal”, por dëshiron, gjithashtu, të punojë në terren me Wenger.
Ky i fundit emëroi një tjetër lojtar të ish-Arsenalit, Jens Lehmann, në stafin e tij, verën e kaluar. Pires, 44-vjeçar, pranon se ai mban ambicie të mëtejshme për t’u kthyer në klub si një anëtar i përhershëm i stafit. “Unë jam ende duke u trajnuar me ekipin e parë dhe ambicia ime është që të punoj në stafin e Arsene Wenger, një ditë, – tha Pires për “Goal”. – Për momentin nuk kam ndonjë lajm, por nuk është urgjente.
Unë jam një ambasador për klubin, punoj për TV francez, udhëtoj me legjendat e Arsenalit dhe orari im është i zënë në këtë moment, por ambicia ime është të punoj me Arsene Wenger dhe Arsenal. Kur jeni ish-futbollist, ju doni të qëndroni me një klub. Dhe Arsenali është klubi im”. Pires është një nga futbollistët më të famshëm, që ka djalin e tij të regjistruar në Akademinë e Arsenalit.
Pires zbulon se njohuria e Wenger-it për klubin shtrihet në çdo aspekt, duke përfshirë nivelin e të rinjve: “Wenger di gjithçka që po ndodh në Akademinë e Arsenalit. Për djalin tim, gjëja më e rëndësishme është që gjithmonë të gëzojë në seancat stërvitore, lojëra dhe turne, sepse është vetëm 10 vjeç, shumë i ri. Ai ka nevojë të mësojë dhe Akademia e Arsenalit është një vend i shkëlqyeshëm për ta edukuar si futbollist i ri, por nuk i vë asnjë presion djalit tim”.
