Guardiola thotë se s’ka përfunduar ende gara për titull në Premierligë, pas humbjes nga Liverpooli.
Liverpooli ia ka shkaktuar humbjen e parë Manchester City këtë sezon në Premierligë, duke e mposhtur 4:3 në “Anfield”, shkruan Gazeta Express.
Kjo humbje e lë Man Cityn në kuotën e 62 pikëve, 15 më shumë se përcjellësi më i afërt Manchester United. Por, Djajtë e Kuq kanë një ndeshje më pak të zhvilluar dhe nëse fitojnë të hënën kundër Stoke City, diferenca ngushtohet në 12 pikë.
Pavarësisht se ekipi i Guardiolas është shumë pikë para ndjekësit më të afër, ai thotë se asgjë s’ka përfunduar sa i përket titullit të Premierligës.
“Realiteti është se humbëm një ndeshje dhe tani kemi një javë kohë për t’u përgatitu për sfidën me NeWcastle”, u shpreh Guardiola.
“Bëmë paraqitje të mirë, në pjesën e dytë luajtëm me të vërtetë mirë. Por, pas golit të dytë dhe të tretit që shënuan shpejtë e më pas të katërtin, ishte e vështirë për t’u rikuperuar nga kjo”, shtoi spanjolli.
“Gjithmonë kam thënë se Liga është e gjatë dhe se asgjë s’ka përfunduar. Ka edhe shumë ndeshje të vështira dhe duhet të fokusohemi ndeshje pas ndeshje”, theksoi mes tjerash Guardiola.
