Spalletti është i zhgënjyer me barazimin 1:1 me Spalin.
Fillimisht skuadra fitonte pa bindur, më pas filloi të fitojë dhe të bindë, por tani Interi as nuk fiton dhe as nuk bind.
Prej 9 takimesh radhazi zikaltrit nuk gjejnë fitoren, ndërsa në 7 ndeshjet e fundit në kampionat, kanë marrë vetëm 5 nga 21 pikët e mundshme, shkruan Gazeta Express.
Kjo situatë është nga më negativet dhe tani duket se në shtëpinë zikaltër ka rënë edhe imuniteti i Luciano Spallettit, pas barazimit 1:1 me Spal.
“Është e qartë, kur pranoni një gol të atillë, mbeteni gojëhapur”, u shpreh Spalletti, pas golit të barazimit që pranoi Interi në minutën e 90’të.
“Kemi shumë punë për të bërë. Nuk do të thosha se jam i brengosur, por thjesht nuk kam parë përmirësime edhe kur fitonim ndeshje të njëpasnjëshme. Duhet të gjejmë balancën dhe të jemi të fortë mentalisht, derisa nuk ndodh kjo – nuk do të shkojmë edhe larg”.
