Pas Coutinhos është padyshim kileni Alexis Sanchez futbollisti më i përfolur në këtë merkato dimri, me Arsenal që refuzoi në verë një ofertë stratosferike prej €80 milionë të Manchester City, kur yllit të “Topçinjve” i kishte mbetur vetëm 1 vit nga skadenca e kontratës.
Tashmë që ditët e Sanchez te ekipi londinez sa vijnë e shkurtohen, trajneri i Arsenal, Arsene Wenger mohon që të jenë vendosur kontakte mes dy klubeve. “Nuk ka patur kontakte me Manchester City. Sanchez është mes titullarëve të mundshëm për ndeshjen e nesërme kundër Chelseas, për Kupën e Ligës angleze”, deklaroi Wenger.
Pavarësisht pretendimeve të trajnerit Wenger, sipas raportimeve të “The Guardian”, klubi që kryeson Premier League ka paraqitur tashmë ofertën prej €25 milionë, ndërkohë që konfirmohet gjithashtu se vetë Alexis Sanchez ka gjetur akordin personal me “Qytetarët”, për një kontratë që parashikon pagën prej €300,000 në javë.
Pep Guardiola këmbëngul që të përforcojë edhe më shumë sektorin e tij ofensiv për pjesën e dytë të sezonit, me trajnerin e Manchester City, insistues për tu ribashkuar me ish-futbollistin e tij nga kohët e Barcelonës.
