Jose Mourinho iu ka kërkuar drejtuesve të Manchester Unitedit ta transferojnë N’Golo Kanten gjatë verës, nëse dëshirojnë që ai të vazhdojë të jetë trajner i skuadrës, raporton Don Balon.
Në dy sezonet e fundit, Kante ka treguar se mbase ai është lojtari më vendimtar që e ka pushtuar Premierligën angleze.
Mesfushori francez i ka fituar dy tituj të Premierligës në dy sezonet e fundit, me Leicester Cityn papritmas para dy viteve dhe sezonin e kaluar me Chelsean.
Por, këtë sezon duket se ai do të dështojë ta përsërisë një gjë të tillë, pasi Manchester City spektakolar i Pep Guardiolas është shkëputur larg në renditjen tabelore dhe është në rrugë të mirë për ta siguruar titullin para kohe.
Kante është bërë lojtari i dëshiruar nga Jose Mourinho për sezonin e ardhshëm. Në fakt, portugezi tashmë i ka dhënë ultimatum Manchester Unitedit: transferimi i yllit francez është kërkesa që ai ta vazhdojë punën në “Old Trafford”.