Flamurtari realizon goditjen më të madhe të merkatos së janarit në Shqipëri. Vetëm pak orë përpara mbylljes së afatit të transferimeve të dimrit, vlonjatët siguruan senegalezin e lindur në Spanjë, Mamadou Tounkara. Një supersulmues jo vetëm për skuadrën kuqezi, por ndoshta emri më i rëndësishëm i kampionatit shqiptar në këtë repart. Vetëm 22-vjeçar, Tounkara ka një të kaluar të rëndësishme.
Lojtari ka qenë pjesë e Akademisë së Barcelonës, përpara se në vitin 2012 të kalonte në ekipet e moshave të Lazios. Në vitin 2014 debutoi me ekipin e parë, duke luajtur edhe dy ndeshje, për tu huazuar më tej në Serinë B te Crotone dhe skuadra satelit e bardhekaltërve, Salernitana, ku sulmuesi ka patur mundësi të aktivizohet.
Klubi kuqezi ka mbyllur detajet e transferimit të Tounkara, duke përforcuar edhe më tepër sulmin, i cili është shndërruar në repartin më të frikshëm të kampionatit. Afrimi i sulmuesit të Lazios i shtohet blerjeve të Muarem Muarem dhe Nedeljković, ndërsa në skuadër ka lojtarë të rëndësishëm si Tomislav Busic, Danilo Alves e Sekou Camara. Me një sulm të tillë në Vlorë ëndërrojnë dhe tashmë fitimit i titullit që mungon prej vitit të largët 1991, nuk duket utopi.
