Jose Mourinho mendon se Manchester United duhet ta kishte “vrarë” Burnley-n në pjesën e dytë pas fitores së ngushtë 1-0 në Turf Moor. Ishte goli i Anthony Martial ai që vendosi fatin e ndeshjes.
Mourinho ishte i kënaqur me mënyrën se si luajti skuadra e tij por beson se ajo mund të kishte mbyllur ndeshjen më herët me rastet e Pogba dhe Lingard.
“Nuk është paraqitje jonë e zakonshme por është paraqitja që duhej për të mundur një ekip guximtar si Burnley,” shprehet trajneri i United në konferencën për shtyp pas ndeshjes.
“Ne e dimë mënyrën se si luajnë ata, ata janë më të mirët në stilin e tyre, dhe duhet të adaptohesh për të qenë i suksesshëm. U adaptuam mirë nga pikëpamja defensive.
“Duhet të kishim shënuar një gol të dytë për të vrarë ndeshjen, dhe u vumë në vështirësi ku duhet të kishim luftuar deri në sekondën e fundit.”
Mourinho ndalet të flasë edhe për Alexis Sanchez: “Për momentin asgjë nuk është e finalizuar,” por pranon se një lojtar si Sanchez i duhet United.
“Për momentin, kemi katër sulmues për tre pozicione, dhe një rezervë. Ibrahimovic ka qëndruar jashtë pothuajse gjatë gjithë sezonit.
“Në repartet e tjera jemi mirë, por në sulm kemi nevojë për pak kompeticion.”
