Tottenham Hotspur do të presë Manchester United në një përballje titanësh në “Wembley”. Të besuarit e Jose Mourinho vijnë nga pesë fitore radhazi në të gjitha veprimtaritë me 12 gola të shënuar dhe asnjë të pësuar. Alexis Sanchez debutoi kundër Yeovil me fanellën e “djajve” dhe tregoi menjëherë vlerën e tij duke dhënë një asist. Kiliani, i blerë 10 ditë më parë nga Arsenal, ka luajtur shtatë herë kundër Tottenham duke shënuar vetëm një gol në dy fitore të arritura, teksa ka pësuar vetëm një humbje, sepse katër ndeshje janë mbyllur në barazim. Tottenham vjen në këtë përballje pas dy barazimeve dhe i fundit ka qenë ndaj Newport në “FA Cup”, me golin e shënuar në fund nga Harry Kane.
“Isha shumë i zhgënjyer nga fakti që nuk kishim të njëjtin motivim dhe dëshirë për të luftuar si kundërshtari,” – tha trajneri i londinezëve Mauricio Pochettino, që duket se nuk do ta ketë këtë problem kundër Manchester United
Edhe pse statistikat tregojnë se Manchester United është skuadra më në formë nga të dyja, Tottenham ka pasur një ecuri për t’u nënvizuar në fushën e saj. Në tetë ndeshjet e fundit të luajtura në “Wembley”, Spurs kanë fituar tetë dhe barazuar dy. Gjithsesi, përballë do të ketë mbrojtjen dhe portierin më të mirë të kampionatit. David De Gea ka mbyllur 14 ndeshje pa pësuar gol në Premier League, më shumë se secili prej kolegëve të tij në këtë kampionat. Për më tepër, Tottenham ka fituar dy përballjet e fundit në shtëpi kundër Manchester United. United nuk ka fituar asnjë nga pesë ndeshjet e fundit si skuadër udhëtuese kundër Tottenham me dy barazime dhe tre humbje.
Harry Kane mbetet futbollisti më në formë i Tottenham me gjashtë gola të realizuar në katër ndeshjet e fundit, por ndaj United ai ka shënuar vetëm një gol çdo 500 minuta. Nga ana tjetër, Anthony Martial shënoi golin e vetëm për Manchester United në fitoren 1-0 kundër Spurs në fazën e parë. Ai ka shënuar në tre ndeshjet e fundit që ka luajtur, ndërsa në FA Cup kundër Yeovil u la pushim nga Mourinho. Gjashtë ndeshjet e fundit mes këtyre dy ekipeve janë fituar gjithmonë nga skuadra vendase dhe kanë prodhuar mesatarisht 2.1 gola. Të dyja skuadrat nuk kanë shënuar më shumë se një gol në shtatë përballjet e fundit mes tyre.
